Утрински / 14.11.2003
ЕВРОСОНГ
Од 60 песни пристигнати на конкурсот за "Евросонг 2004", селекциона комисија во состав: Иван Мирчевски, Аритон Крлију, Радица Митиќ, Светлана Марковиќ, Илија Пејовски, Михаил Ренџов, Џон Илија-Апелгрин, Арбен Шаќири, Данаил Дарковски, Јана Андреевска и Тоше Проески, по неколку преслушувања се одлучи за девет песни. Авторите на композициите од кои ќе биде одбрана претставничката за евровизискиот фестивал што ќе се случува во Истанбул се: Симон Трпчевски, Љупчо Мирковски, Кире Костов, Александар Алачки, Александар Чекреџи, Баже Темелков, Зорица Кантраџиска, Јован Јованов и една песна од изведувачот Тоше Проески. Еден од првите што реагираше на селекцијата на песните е композиторот Григор Копров кој има забелешки на начинот на работата на комисијата. Со објавувањето на анонимниот конкурс, МРТВ презеде обврска на сите учесници да им обезбеди фер селектирање и право на тајност сў до конечниот избор. Меѓутоа, уште во стартот, во некои средства за информирање беа објавени имињата на 12-те члена на жирито. Со таа постапка е прекршен принципот на целосна тајност, со што се отвори можноста за разни професионални и вонпрофесионални сомневања околу изборот на композицијата. Според Копров, авторите на композициите се доведуваат во нерамноправна положба, а членовите на жирито се изложени на разни притисоци, со што е неминовно пристрасно и необјективно гласање. Со самото тоа што организаторот не обезбеди поцелосна проверка и контрола на работата на жирито, како и транспарентност на самиот избор со присуство на новинари и други фактори на музичката јавност, Копров ја изразува својата загриженост за избор на вистинска композиција која наредната година ќе ја претставува нашата државата на најзначајниот музички натпревар во Европа.
